Кадыр Абакиров
Адамдын Асыл ойлору
* * *
Биз жымжырттыкта болуп, бир кишинин сөзүн угушубуз керек. Бирок ошол кишибиз акылдуу, улуу кеменгер эл башкарган киши болуш керек.
* * *
Эне бала үчүн кенен аалам, ал эми бала эне үчүн жаз алдында жаңы бүрдөп келе жаткан жаш өсүмдүк.
* * *
Жакшы буюм көпкө сакталат. Качан ал өз сапатын жоготкондо, ошондо жоголот.
* * *
Асыл-ой мурас баардык замандарда сакталып келген.
Анткени анын ичинде такыр түгөнбөгөн керемет ойлор калкып жатат.
* * *
Кээ бир адамдар айтат: – Сүйүү кармалбайт, – деп.
Сүйүү жүрөгүңдө гана кармалат. Сүйүүнү кармай албаган
жүрөк, жүрөк эмес.
* * *
Жүрөгүнө сүйүүнү алып жүргөн адамдар, алар бактылуу адамдар.
* * *
Жаап жаткан жаигырга:
– Жамгырым сен мага жомок айтчы!-дедим. – Мен жомок айтып жатам сен тыңшабай жатасың, Тыңшасаң укмаксың, менин үнүмдү улгайып калган адамдар угуп, айткан жомогума түшүнөт .-деди.
* * *
Чындыкты айткан адамдын сөзү – күмүш, ал эми элди чындык жолуна үндөгөн адамдын сөзү – алтын.
* * *
Жашооң канчалык тынч болсо, өмүрүң ошончолук бакубат жана пейпил.
* * *
Жаштар – жаштыгы менен бактылуу. Ошол жаштыкты эмгек менен айкалыштырса, алар андан бетер бактылуу.
* * *
Бай менен жарды экөө тең эле адамдар. Болгону бирөөндө бар, экинчисинде жок.
* * *
Кылыч эмне үчүн жасалат. Адамды өлтүрүү үчүнбү, же Ата-Мекенди коргош үчүнбү? Буга аны урунган жоокер жооп берсин.
* * *
Сүйүү бул түгөнгүс нерсе. Ошол үчүн анын жолу бийиктиктен башталган. Ал түгөнгөн күнү жашоонун жүрөктөгү оту өчүңкү тартат.
* * *
Мөмөсү бар даракка көптүн көзү түшөт.
Эстүү, сулуу кызы бар үйгө жигиттердин көзү түшөт.
Талантты бар адамга журттун көзү түшөт.
Демек, пендедеги жакшылыктын баардыгына адамдын көзү түшөт.
* * *
Атасы кетсе, бала үчүн эне калат. Энеси кетсе, бала үчүн жетимдик калат.
* * *
Адам аракты ичет. Арак тиги кишинин акыл-эсин ичет.
Кыскасы экөө бирин-бири ичет.
* * *
Өмүр сага бир берилет. Аны жаман нерсеге алдырып жибербей сак бол! Келечегиңе сак бол! Баарына сак бол!
* * *
Эски нук жаңы нукка керек.
* * *
Китептей дос күткөн эмесмин. Китеп менин сүйүүм. Китеп кубат берген бвйлыгым. менин кубанычым жана убактымды алган арманым.
* * *
Баатырдык өлбөйт. Баатырдык элдин канында жашап гүлдөп жатат. Ошон үчүн элде, баатырдык да, баатырдыкты жараткан, баатыр да баардыгы жашап жатат.
* * *
Акылмандуулуктун өзү жакшы, анын уңгусунда, элге арналган жакшылык сүйүнүчтүн уңгусу бар.
* * *
Саламаттык жана ден-соолук ар бир адам үчүн керек. Адамдар үчүн эмес ал биздин коомго керек.
* * *
Ай жалгыз, бирок адамдар турганда ал жалгыз эмес. Аны жалгыз
таштабай пенделер караан тутуп турат.
* * *
Чындыктын энеси – эл, атасы бейпил – жашоо. Кудайым турганда ушуну унутууга болбойт.
* * *
Караңгыдан жарык түбөлүк артыгыраак, жоктон бар артыгыраак, бай жашагандан орточо жашаган артыгыраак, баарынан тынч жашоо артыгыраак.
* * *
Таланттын артында эмгек жатат, эмгектин артында өлбөстүк баардык жакшы нерселер жатат.
* * *
Бийликте жүрүп жеп ичкен киши мекенине батпайт, эби жок калдайган идиш казан аякка батпайт, жалкоо киши үй-бүлөсүнө батпайт.
* * *
Жашоо миң сырдуу, а биз ошол сырды сактап, аралап бараткан адамдарбыз.
* * *
Көзү өтөөр адам өзүнүн күнөөсүн айтып, кечирим сураганы жакшы, анткени ал, чын дүйнөгө тазаланып барганы жакшы.
* * *
Турмушта өмүр бар, өлүм бар, кайсынысын ойлойбуз албетте – өмүрдү.
* * *
Жеңил мүнөз адамды аяйм, анткени алардын ойлоо жөндөмдүүлүгү башкачараак болуп жатпайбы.
* * *
Ооз сүйлөйм дейт, жүрөк сүйсөм дейт, мээ ойлонсом дейт. Адамдын баардык денеси өмүр сүрүп, тынч жашасам дейт.
* * *
Саламаттык узак жашоону алып жүрөт, узак жашоону эле эмес өзү менен эмгекти, кубанычты коштоп жүрөт.
* * *
Ата-журттун амандыгы баарыбыздын амандыгыбыз. А биздин амандыгыбыз ата-журттун амандыгы.
* * *
Чындыктын бар экенин билбеппиз, чыныгы адабий
чыгарманын бар экенин дагы билбеппиз, аягында чыныгы жазуучу жашап анын өтүп кеткенин да билбеппиз.
* * *
Асылдык, сулуулук, көркөмдүк менен айкалышса, жашообуз макмал төрдөй көркүнө чыкканы ошол.
* * *
Алдуудан алсыз коркот, чындыктан жалган коркот, өмүрдөн өлүм коркот.
* * *
Күн аяктап, түн келди. Баягы убакыт кайрылып келди. Эмнеге
өткөн өмүрүбүз кайрылып келбеди?
* * *
Жаратылышта толгон сырдуулук бар.
Адамда толгон сырлар бар.
Менимче адам менен жаратылышты байланыштырган бир сырдуу шыбыртты дагы бар.
* * *
Уйку дагы жакшы нерсе, ден-соолук дагы кымбат нерсе, оорулуу адамга уйку жана ден-соолуктун келгени андан бетер асыл нерсе.
* * *
Жалкоолук уйку менен, талант эмгек менен.
* * *
Элге баатырдык керек, баатыр жалгыз эмес ага эл керек.
* * *
«Менин жашоом чындык!– деп айт»., чындыктын артында чыныгы турмуш турат!» деп дагы айт.
* * *
Татаал турмуштун артында драма жатат же, чиеленишкен тагдыр жатат.
* * *
Элдин байлыгын ала качкан эл башчы арам, же ошону жактап келген пенделер андан бетер арам.
* * *
Тараза тактыкты жаратат, а тактык чыныг турмуштун дал өзүн жаратат.
* * *
Жүрөккө жакшылыктын тийгени күн, же ошол жакшылыктын башкаларга чачыраганы ал да күн.
* * *
Жүрөгүңдөн башкаларга чачылган нур асыл нерсе, ал алтындан кымбат нерсе.
* * *
Бейиш бул сыймык, же элине бейишти тараткан журт башчынын иши сыймык.
* * *
Китеп-бул сырдуу нерсе, ошол сырды түшүнүү менен окугун, окуп эле жөн койбой терең ойлонгуң андан бетер сырдуу нерсе.
* * *
Чындыкты жалган деп айтылган күнү жашоо өлөт, же жашоо өлгөн күнү адамдын жан дүйнөсү өлөт.
* * *
Ыйык от жашоону билдирет. Ыйык от адамга, же
жаратылышка, же ааламга болгон таза сүйүүнү билдирет.
* * *
Сен чындыкты көрдүңбү, демек жашоону көрдүң.
* * *
Мен өзүмү көрүш үчүн күзгүдөн эмес, башка адамдын көзү менен өзүмү карагым келет.
* * *
Коркунучтан адамдарды сактап калган баатыр жакшы же, коркунучка элин кабылтпай аман-эсен алып кеткен эл башчы жакшы.
* * *
Жүрөктөгү жалган нерсе кеткен күнү жашоону чындык аралайт.Чындык болгон жерде, чыныгы турмуш башталат.
* * *
Бактылуулукта көп сыр бар. Мен бактылуумун дегендер бактылуу эмес. Эл бактылуу деген адамдар бактылуу.
* * *
Жер улуу жана дагы күн улуу, жер үстүндө жашап жаткан адам улуу. Анан акыйкатта өз тилин, өз жерин, өз журтун сактап турган эл улуу.
* * *
Жашоо тынчтыктан турат, тынчтык түбөлүктүүнүн
түбөлүктүүсү болуп турат.
* * *
Ушакты айткан адамды шайтан түспөлүндө көрөбүз, ал эми шайтанды коргогон адамды эмне түспөлүндө көрөбүз?
* * *
Көзү өткөн адамдарды эскеребиз, аларды эскерүү менен башкаларга жасаган жакшылыгын кошо эскеребиз.Адамдарга таштап кеткен эмгегин дагы унутпай эскеребиз.
* * *
Кой маарап, жылкылар кошкурган үндү элестеттим. Демек мен туулган жерге барбай туруп эле аны сагыныч менен эсимде элестеттим.
* * *
Токтоолуктун эс акыл менен айкалышы эң бактылуу көрүнүш.Эс акыл адамдын адамкерчилигин сактап келген көрүнүш.
* * *
Каакымдар өсүмдүк анын көрүнүшү жерде да күн бар деген ыйык белги болчу.
* * *
Сууга уу төгүлсө, андагы балык өлөт, балыктан мурун агып жаткан жандуу суу өлөт. Аны карап турган адамдын жан дүйнөсү өлөт.
* * *
Ырайымсыз таш боор адамдын жүрөгүн аё сезими араласа, анда ал адамда жакшы бурулуш аралаган.
* * *
Ар бир үй-бүлө өзүнчө дүйнө анда ааламда канча дүйнө бар экенин айтууга болобу?
* * *
Адамдар мен десеңер акылга, сүйүүгө жана тунук аң сезимге баш ийгиле! Ошлорго баш ийсеңер адамкерчиликке баш ийген болосуңар!
* * *
Тирүүсүндө чындыкты айткан адам өлгөндөн кийин деле чындыкты айткан адам.
* * *
Тирүүсүндө унутулган жетекчи өлгөндөн кийин андан бетер унутулат.
* * *
Уйку – тынчтык, ал дагы адамга берилген жашоонун сонун бөлүгү, бирок өлүм эмес. А өлүм кайрылгыс жымжырттык.
* * *
Баатырдык өлбөйт ал элдин канында жашап жатат.
Ошол үчүн эл да, баатырдык да жашап жатат.
* * *
Эски нуктан жаңы нук өйдө, анткени ал жаңы жаралган көрүнүш.
* * *
Күнөө кылуу да бар аны оңдой билүү да бар, демек турмушта баары бар.
* * *
Эскилер эскирет, жаңылар келет же, жашоо көркүнө чыга берет.
* * *
Жакшылык кылуу жаман көрүнүштү түбөлүк жеңет.
* *
Наадан киши сүйүү эмне экенин билбейт, андан мурун чыныгы жашоону сүйүү эмне экенин билбейт.
* * *
Адамдагы асылдык алтындан кымбат анткени, асылдыктан миңдеген адамдар үлгү алат ошол үчүн кымбат.
* * *
Каза болгон адамдын денеси муздак.
Улуу адамды ушактаган сөз муздак.
Жакшы сөзгө жибибеген жүрөк муздак.
* * *
Ата-бабаңын тилин сактап кал!
Аталар өскөн конушту сактап кал!
Эмне жакшы нерсе болсо, ошонун баарын сактап кал!
* * *
Чындык жашоого жакын.
Эмгек талантка жакын.
Жардыга жокчулук жакын.
Бийик тоонун башы карга жакын.
* * *
Ак карлуу тоонун башы улук.
Көп жашка барган кары улук.
Калкын сыйлаган эл башчы улук.
Эл башчыны сыйлаган эл улук.
* * *
Бийликтин кумары жагымсыз нерсе, ошол кумарга
алдангандык андан бетер жаман нерсе.
* * *
Ачылган каакым жердеги күн, а күн жерден асманга чыгып кеткен от.
* * *
Бүгүнкү иш бүгүнкүсү менен эсте калбаса, ал унутулган иш, ал эми бүгүнкү иш келечекте унутулбай айтылса, ал түбөлүктүү иш.
* * *
Ооруп жаткан адамдын шагын сындырып, жаман сөз
айтуу, күнөөгө барабар.
* * *
Ар бир күн адам үчүн ачылышты, жаңылыкты талап кылат, ошондуктан адам өмүрү жагымдуу жана жооптуу.
* * *
Адам – адам менен жакшылык-жакшылык менен же, ар бири өз жолу менен.
* * *
– Өлбөстүккө бараткан жол кайда?
– Ал түбөлүк унутулгус ак эмгегиңде, – деген үндү уктум.
* * *
Асканын сыры анын бийиктигинде, аска канчалык бийик тартса, ал ошончолук сырдуу жана сүрдүү тартат.
* * *
Жаратылыш мени менен десем болот, менин жвшоом
жаратылыш менен десем да болот.
* * *
Чыныгы акындын жолу баардык кезде оор болот, ал эми адабияттын тарыхында калуу андан бетер оор болот.
* * *
Бобул асканын каардуу, сүрдүү тартканы эрдик, ал эми ушул бийик аскадан ылдый карай шаркыратманын кулап түшүшү андан бетер эрдик.
* * *
Өлүм – бир, өмүр – бир, алар эч убакта экөө болгон эмес.
* * *
Ээси ким экенин билип анын үйүнө бар, падышасын таанып, анын мекенине бар.
* * *
Жакшы жаңылык болуп турган элде жакшы жашоо болуп турат.
* * *
Сонун жайдын өтүшү эң сонун көрүнүш жана дагы кайра келгис арман.
* * *
Өз баламан өмүрүмү көрүп турам, а неберемен ошол өмүрүмдүн андан аркы уланышын көрүп турам.
***
Китептен кантип акылман болушту окуйсуң бирок, жашооңдо акылман адам болуш ал өзүңдөн,
* * *
Көзгө көрүнүүчү жана көрүнбөөчү нерселер болот. Көзгө көрүнбөгөн нерселер жүрөктөгү назиктик жана боорукердик. Ар бир адам ошол жагы менен сыймыктанса болот.
* * *
Жүрөк бул кичинекей эле дененин бөлүгү бирок анда ааламды сүйгөн нерсенин жашынып жатышы, биз үчүн таң калаарлык табышмак.
* * *
«Бул жашоодо эмне улук десе?», «Бир жаралган адам пендеси улук деп, айтат элем». «Дагы эмне улук десе, ошол пенденин таалайлуу жашап жатышы, андан бетер улук көрүнүш деп дагы айтат элем».
* * *
Өмүр берекесин бергенде адамдын жан дүйнөсү байыйт.
* * *
Адамдын жан дүйнөсүндө шык, талант оргуштаса анда жашоонун жаңыланып жатканы.
* * *
Так болуунун белгиси, бул турмушка ынангандык.
* * *
Анын оюнда башка бирөөнө карата арамдык болсо, ал кеселден жаман дарт.
* * *
Ар бир окуучунун жан дүйнөсүнүн кулпусу болот. Анын ачкычын мугалим, ата-эне жасап, аны жаап ача алат.
* * *
Жашоонун күзгүсү – көркөмдүк, көркөмдүктүн күзгүсү бул – түбөлүктүүлүк.
* * *
Адамдын көкүрөгүндө эмне болсо, ишинде деле ошол шоола бүлбүлдөп жанып турат.
* * *
Бала бул – гүл, эми аны накта гүл кылып өстүрүү, ата-эненин жана мугалимдердин жана замандын колунда.
* * *
Баардык адамдан чыныгы акын чыкпайт, чыныгы акын өтө сейрек жаралат. Бирок баардык адамда ыр жаратпаса да, акындык жаратылыш кездешет десек болот.
* * *
Уста балтаны курчутат. Балта отун жарат. Отун менен уста тамак бышырып ичет. Балта, отундун эки бөлөк окшошпогон тагдыры бар. Бирок экөө устаны тамакка тойгузду
* * *
Өскөн гүл – жаштыгың, жаштыгың жашыл – гүл болуп көрүнүп турат.
* * *
Ыр – бул өлбөстүк, өлбөстүктүн – өзү деле ыр.
* * *
Өткөн күндөрүбүз – мунарык. Ошол мунарыктын арасында биз сүйгөн жана азаптуу өткөргөн өмүрүбүз бар.
* * *
Келечеги жок бийлик түбү чирип, кулай турган дарактын элесин берет. Ошол дарак кулап бийликтин адамдарын басып калбайбы?
* * *
Таланттуу болуу таалайың, аны калың журтка көрсөтүү андан кийинки окуя.
* * *
Жашоодо баары эле оор. Жеңил нерсе жок. Ошол үчүн өмүр сүрүү кымбатка турат.
* * *
Жашоо парз бирок, кандай өмүр сүрдүң, ал тагдырдагы негизги
жыйындысы.
* * *
Адамдын өмүрүнүн аякташы бир сырдуу нерсенин бүтүшү болуп эсептелет.
* * *
Талант бир сырдуу эмес, миң сырдуу ошол үчүн анын жолу жаңы жаралып, өмүр сүрүшү түбөлүктүү табышмак.
* * *
Эч кимге ийгилик каалабаган адамдын бир эле досу бар ал – жалгыздык жана ичи тардык.
* * *
Жалгыздыктын бир сырдуу түйүнү бар, ал ойлонууну өзү менен ала жүрөт. Жана тынчтыкта жакшы тыянак чыгарат.
* * *
Бакыт жалгыз эмес, ал адамга дос, аны издеп таап алуу өзүбүздүн иш.
* * *
Талант деле сырдуу нерсе, себеби анын уңгусунда биз билбеген табышмактуу эмгектин көрүнүштөрүжашынып жатат.
* * *
Жашоо ар бир адамга табышмак анткени, анын сырдуу жагы ачылбай табышмак бойдон калып жатпайбы.
* * *
Түн ичинде эшикте жааган жамгырдын үнүн тыңшап жатам, демек өлбөс өмүрдүн үнүн тыңшап жатам.
* * *
Бир гүл миң гүлдүн көрүнүшүн жана жытын бере албайт, бирок аз болсо да, алардын жашоо ыргагын элестете алат.
* * *
Биз жашап, эмгектенип, кимдир бирөөн сүйүүгө, урматтоого аны жакшы көрүүгө милдеттүүбүз, анткени биз адамдарга бакытты чачалы деп, төрөлгөнбүз.
* * *
Адамдар самолётту, кемелерди, ар кандай жаңы ачылыштарды акылмандык менен жасаган, Бирок аларды түзгөнгө баягы эле тунук акылы жардам берген.
* * *
Ажайыптуу көрүнүш бирөө ал – кооздук.
* * *
Турмуштун агымын жиреп, каршылыкка аттанбаган адам эч убакта жаңылбайт жана жаңылык жаратпайт.
* * *
Биз билбеген ажайыптар китепте жатат. Ошол үчүн адамдар аны жан дүйнөбүз тазарсын деп окушат.
* * *
Талкалоо кайра куруудан он эсе жеңил. Бирок талкалаган
нерсени оордуна келтирүү жүз эсе оор.
* * *
Ар бир күндө жакшы жаңылык жаратып турган адам бай адам.
* * *
Жаңы нерсени жаратуу өтө оор ошол үчүн жашоо жооптуу.
* * *
Адамдын жашоосун жеңилдетип, жаңылык алып келген адам ал дүйнөдөгү жаңы адам, же бактылуу адам.
* * *
Өлүм – жеңил себеби, сен пендечилик баардык түйшүктөн кутулдуң, төрөлүү – оор анткени, сенин астыңда тоодой түйшүктөр үйүлүп турат.
* * *
Бийликтин жогорку тепкичине чыгып алып, дардалаңдап көпкөндүк ал – наадандыктын дал өзү. Же тепкичтен кулап кетүүнүн дал өзү.
* * *
Жаңылыштыгын сезбеген адам дүйнөдөгү такыр жаңылбаган адам.
* * *
Үнөм адамды көп чыгымдан сактап калат.
* * *
Билим кол жеткис бийиктик акылдуу жаштар ошол бийиктикке жетели деп, умтулуп жатышат.
* * *
Билимдүү жаштардын жолу өзгөчөлөнөт ал башкалардан ошонусу менен айырмаланат.
* * *
Төрөлүү менен өлүмдүн ортосунда өмүр болгон.
* * *
Жашоо – кубаныч, ошол үчүн анын аягы бүтпөс поэма.
* * *
Менин китептерим менин жомогум, жомогум менин өмүрүм.
* * *
Кара өзгөйлүк жана боорукерликти экөөн тең эле адам жараткан бирок аларды эки башка адам жараткан.
* * *
Мындан жүз жыл кийин биз жок болобуз бирок, жер үстүндө мындан дагы, бактылуу жашоо келсе экен деп үмүттөнүп кеткен болобуз.
* * *
Гүл бул назиктик, а кара өзгөйлүк гүлдөн ары жаткан эшектин кыгы.
* * *
Жакшылык ыплас жерде деле жашай берет. Бирок аны адамдар
ыпластан бөлүп алганга аракет жасайт.
* * *
Жаштык өткүрлүгү менен айырмаланат, бирок өткүрлүктү коштогон сөзсүз акыл болуш керек.
* * *
Наадандыкты таш боор жүрөк жаратканын билдик, назиктикти кайрымдуу жүрөк жаратканын дагы билдик.
* * *
Таш боорлук менен боорукерликти айырмалай албаган адамдан эч нерсени деле күтө албадык.
* * *
Наадандыктын бүтүүчү күнү болот. Зили жакшылыктын бүтүүчү күнү болбойт анткени, ал түбөлүктүү ыймандуу көрүнүш.
* * *
Адамдын төрөлүшү кубаныч, а өмүрдүн бүтүшү оптимисттик трагедия.
* * *
Жаратканым айтат:
– Сабады, талап-тоноду, өлтүрдү деген сөздү укпайын –дейт.
Жараткан айтат:
– Кубанычка бөлөдү Биз бактылуубуз Келечегибиз кенен деген сөздөрдү угайын-дейт.
Ак сакалчан кырылар айтат:
–Айланайын адамдар жараткан жалган айтпайт, Ошонун оюн аткарсак бизге бакыт келет,-дейт.
** *
Адам өмүр бою килем сого берет анысы өзү бүткөргөн эмгеги. Ал килемди кандай бүткөрдү иштин мааниси ошондо.
* * *
Адам үчүн -уйку эс алуучу көрүнүш.Ал эми түш жашоодон келген сыйкырдуу элес.
* * *
Уста узанат, өтүкчү өтүк ултарат, мугалим бала окутат, койчу кой кайтарат, жылкычы жылкы багат. Кыскасы бул дүйнөдө бир да адам бош эмес. Баары эле эмгектенип жатат. Мунун баары өлбөстүктүн уланышы.
* * *
Жашоодо ар бир нерсенин оорду бар, Оорду жоктор оордун таппай адашып жатат. Акыры адашкандар деле оордун таап жатат..
* * *
Эки жүздүү адамдын өңүнөн караңгылыктын көлөкөсү түшүп жатат. Ал кандайдыр бир жүрөксүнүү, коркунучту жаратып жатат.
* * *
Адамдын алдында тамеки жана бир шише арак турат.
Тамеки айтты:
– Адамым мени каалашыңча тарта бер.
Арак айтты:
– Адамым мени каалашыңча иче бер.
Мен алардан айыкпас арманга баткан оорунун залдарын көрүп турам.
* * *
Кеч күз эле. Каркыралар асманда учуп баратты. Улгайып калган карыялар асмандагы куштарды карап:
– Каркыралар кош болгула! Кайра аман-эсен кайтып келгиле! Биз дагы карып калдык. Бүгүн көргөн эртең жок. Силер келгенче ким бар, ким жок.
Каркыралар:
– Жок карыяларым андай айтпагыла! Кайратыңарды бекем кармагыла! Биз кайтып келебиз. Силер жок болсоңор, биз жалгыз-сырап калабыз. Бараар жолубуз өтө узак, кош болгула, карыялар!
Карыялар:
– Силер да узак жолдо баратасыңар. Биз да узак жолду бастык. Аман-эсен келгиле каркыралар!»
* * *
Көл жээгинде балыкчы көп. Ошондой эле көлдө балыктар көп, ар бир балык үчүн өмүр бирөө жана дагы өлүм– бирөө.
* * *
Адамды көлөкө ээрчип жүргөн сыяктуу аны өмүр менен өлүм ээрчип жүрөт.
Өлүмдөн кийин эч нерсе ээрчибей калат. Бирок анын өмүрү аз болсо да жашаганы тирүүлөрдүн эсинде калат.
* * *
Чындык адамдын жүрөгүнөн жаралып, жүрөктөн жүрөккө өтөт. Ошонун өзү өлбқстүккө жол.
* * *
Карышкыр болгон жерде койлор тынчыбайт, эзүү болгон жерде – эл тынчыбайт.
* * *
Эки дос эки жакка бөлүнө албай жатты. Баарысынан ошол аянычтуу, анткени алардын бири-биринин жүрөгүндөгү өчпөс мээрими бөлүнө албай жатты.
* * *
Жакшы тарбия болгон жерде макмал чөптөр гүлдөп бакыттын өмүрү өнөт.
* * *
Акылман улуу ойлор адамдын жан дүйнөсүн жаркытат, жүрөккө шоола толгондо, ал өмүрдү жаркытат.
* * *
Адамдар чогулуп ат минип уйгу-туйгу чапкылап жүрүшөт. Ал жерде бир кырсык болгон шекилденет. Эмне болду? Адамдар сабырдуу болгула!
* * *
Короздор кыйкырып, таң да атты. Чыгыш жак алоо жанып, адамдар үчүн бүгүн бир жакшы жаңылык жаралып, кубанычтар пайда болду. Ошондой болсун.
* * *
Улуу китеп талбас улуу эмгек менен табылган. Ал адамдардын жүрөгүнө өчпөс от жагыш үчүн жаралган.
* * *
Тарбиянын башаты – ата, куйма суусу – эне, экөө таалайлуу балдарды тарбиялап болочокко аттантат.
* * *
Тияктан да, бияктан да, иттер үрүп, боз үйлөрдөн адамдар чыгып, бир жерге топтолуп жатышты. Кебетеси бир нерсе болгон окшойт. Деги жакшылык эле болгой эле.
* * *
Адамдар айтты:
– Чындык каякта?
Жооп:
– Чындык силердин жүрөгүңөрдө, жүрөгүңөр булганса чындык качат, андан башка жол жок, – деген үн чыкты.
* * *
Жоктон бар өйдө, бирөөнөн экөө өйдө, жамандан жакшы өйдө.
* * *
Талаадагы дарак жалгыз, асмандагы күн жалгыз, ар бир пендеге анын ден соолугу жалгыз.
* * *
Адам узак өмүр сүрсөм дейт, бирок анын сырдуу түйүнү өзүндө.
* * *
Адам сергек болууга тийиш, ошону менен бирге таза жана тунук да болууга тийиш.
* * *
Басса, турса, сөгүнүп жүргөн адамдардан түңүлдүк, анын оозунан чыккан жаман сөздү угуудан да түңүлдүк.
* * *
Жакшы адам, жакшы төрөлүп, жакшы өлөт. Ошонусу баардык адамдарга үлгү.
* * *
Тынчтыгы жок үй-бүлөнүн атасы жетим, энеси жетим, жада калса балдары да жетим.
* * *
Ачка калуу жаман эмес, баарынан көңүл чөгүү жаман.
* * *
Шайыр адамдын жаныңда жүргөнүң кубаныч, ал күлкүнү тартуулайт. Күлкү чыныгы өмүр.
* * *
Адамдын көңүлүнүн көтөрүлүшү кубаныч. Ал ден-оолукка арка бел болоору дагы кубаныч.
* * *
Адамга сулуулук берилген, аны сактоо ар бир адамдын милдети. Адамдын сулуулугу тышкы кооздук ал жаштыгы менен кошо жаралган.
* * *
Музыка – бул өмүр, анын ичинде биз билбеген асыл кереметтер жашынып жатат. Жашынып жаткан нерсени биздин көңүлүбүз түщүнүп, жан дүйнөбүз кабыл алып жатат.
* * *
Арак, аракеч кишиден көп өч алат. Ал азыр да алып жатат.
* * *
Акылдуу адам арак ичкенден кийин тез эле акылсыз адамга айланып калышы кейиштүү кубулуш.
* * *
Арак бирөө аны ичкендер көп, ичкиликтин айынан акылынан адашкандар андан бетер көп.
* * *
Ажалды тосуунун бир улуу жолу бар ал – эмгек жана дене тарбия.
* * *
Балит турмуш башын салып турат, бирок аны сулуулук жана талыбаган эмгек тазалап турат.
* * *
Эне баласын төрөдү, ал баласын суктанып карап турат.
Ал жөн эле карабай мындан аркы улануучу өмүрүн карап турат.
* * *
Гүл бул кооздук, ал кооздукта биз суктанган бир сыр жашынып жатат.
* * *
Мурунку көзү өткөн сонун адамдарды кайра эскерсек алар тирилип турат.
* * *
Талант бул суктанаарлык нерсе, канчалык суктансак да анын аягына чыга албайбыз, ошонусу менен ыйык.
* * *
Күлкү бул сонун жаратылыш, андан четтеп кетпегиле өмүрүңөр супсак жана жагымсыз тартат.
* * *
Адамды билгизбей коркунучтуу дартка жетелеп бараткан душман бул: тамеки менен арак.
* * *
Сүйүү бул карыганда деле жаралат. Ошол көрүнүштөн өмүргө кооздук жаралат.
* * *
Ар бир адам дүйнөгө жалгыз келип жалгыз кетет.Ошол үчүн жашоо армандуу, Сен өлгөндө сени менен бирөө кошо өлбөйт, ошол үчүн баарыбызга жашоо армандуу.
* * *
Нукура чындыкты сен башка жактан издебе. Ал сенин жүрөгүңдө жаралган, анткени сен чыныгы адамсың.
* * *
Мен өмүрүмдүн бүтөөрүнө ишенем, бирок такыр жашоонун бүтөөрүнө ишенбейм, анткени менин өмүрүмдөн кийин бүтүндөй аалам тирүү жашап жатпайбы.
* * *
Эмгектенип өткөн адам өлүмдөн коркпойт, анткени эмгек баардык кубулуштан тирүү жана улук.
* * *
Чыныгы поэзия бул көркөм нерсе, анткени аны жараткан акын адамдарга окшобогон пенде.
* * *
Поэзиянын ичинде бир сонун нерсе бар, биз андан ачыла элек нерсени ачып жатабыз. Ал ошонусу менен сүйкүм жана көркөм.
* * *
Акын жер айдаган дыйкан, а дыйкандын жан дүйнөсүндө көркөмдүк жана сулуулук жашап жатат.
* * *
Жалкоолук айла кеткен нерсе, айла кеткенден мурун жок нерсе.
* * *
Иштебеген адам тиштебейт деген макал бар. Бирок, тиштеп эле келе жатат, Ал элдин эмгегин оозундагы тиштери менен кырча тиштеп келе жаткан бийликтегилер жана аларды жактаган журт башчысы болуп жатат.
* * *
Дары адамды айыктырат, Дары айыктырбаган ооруну музыка дарылайт. Анын керемети дарыдан миң эсе күчтүүлүк жолу айыктырат.
* * *
Жалкоолукту жеңүүгө болот, ал жеңилбей турган нерсе эмес. Аны жеңип көптөгөн адамдар бакытка жеткен.
* * *
Эс албай эмгектенгендик бакыт. Ошол бакыттын ичинде өлбөстүктүн данеги жашынып жатат.
* * *
Сөз менен айтып бүткүс нерсени биз музыкадан жана китепти окуп түшүндүк.
* * *
Музыка кармалбаган керемет. Аны баардык жүрөк кармай албайт. Ага берилген сезимдүү жүрөк кармаганы гана керемет.
* * *
Атын билбей туруп, ооруну дарылаба. Анын кесепетинен башка оору пайда болот.
* * *
Кайсы адам боорукер жана токтоо болсо, ошол адам күчтүү.
* * *
Алыс жолдо начар адам менен дос болбо. Дос болсоң, ар дайыма сактана жүр.
* * *
Көлдө толкун болуп турбаса, анын жашоосу жакыр, адам эмгек менен жашарбаса, анын келечеги да жакыр.
* * *
Унчукпай коюу дагы жакшы нерсе, бирок аны учурунда таразалап көрүү керек.
* * *
Адамдын жүрүм-турумунан, сүйлөгөн сөзүнөн, анын кандай жан экенин баамдоого болот.
* * *
Дайыма ичкилик ичкен үй-бүлөдө төрөлгөн баланын кандай болоорун ойлогондон коркомун.
* * *
Кимдин жүрөгүндө сүйүү болсо, ал жүрөгүнө жакшылыкты жоготпой сактап жүргөн адам.
* * *
Таттуу уйку – таалайлуу ден-соолук.
* * *
Дени таза эмгекчил адамдын уйкусу да жакшы болот же баары оордунда болот.
* * *
Узак жашоо – кереметтүү сыр. Ошол сырдын түйүнүн узак жашагандар гана билет.
* * *
Уйку – жымжырттык. Эмгек – күрөш. Тирүү адамга экөө тең керек.
* * *
Тубаса маданияттуу адамдардан биз көптөгөн жакшы башталмаларды күтө беребиз.
* * *
Жаныңда акылдуу адам турганда сен өзүңдү, күчтүү адам катары сезе бер.
* * *
Абийир баарынан улуу, ал улуулукту алып жүргөн адам андан бетер улуу.
* * *
Коркунуч болгон жерде тең салмактуулук жоголот. Тең салмактуулук жоголсо жашооңун салмагы жоголот.
* * *
Жүрөк таза болсо, адам таза болот. Андай жерде жашоо жакшы жана коркунучсуз болот.
* * *
Адам жүрөгүн аяш керек. Анткени ага келүүчү коркунуч, кубаныч ошол жүрөк аркылуу келет.
* * *
Адамдын сымбаттуулугу, ички дүйнөсүнөн башталып, анын жалпы байлыгынан түзүлүп турат.
***
Бала курсакта жатканда эле баарын угуп, билип, көрүп турат дейт. Аталар ошону эстен чыгарбагыла, ошол үчүн энелерди сыйлап жакшы күтө көргүлө!.
* * *
Мергенчиге мылтык керек.
Балыкчыга кайырмак керек.
Жазуучуга кагаз жана калем керек.
Баарынан мурун бул үчөөнө: ден-соолук керек.
* * *
Ташкындап турган кайрат – бул ден-соолуктун булагы.
* * *
Адамдын ойлогон оюу ишке ашкандан кийин, ал дагы келечекте жакшы жолго аттанат.
* * *
Кечөөгүнкү күн башка, а бүгүнкү күн кечөөгүнкүдөй эмес, а эртеңки күн ал экөөнөн сөзсүз айырмасы болот..
* * *
Базарчылар базарда экен, койчулар кой кайтарып тоодо экен. Балыкчылар балык кармап көлдө экен. Кыскасы бул жерде бош адамдар жок экен.
* * *
Баардык ойлонуу адамдын нерви аркылуу өтөт. Каар, кубанч, толкундоо нерв аркылуу өтөт. Аны өмүрдү сактагандай сакташ керек.
* * *
Көө кара, жашайм дегендер каралыкка эмес, актыкка умтулуш керек. Арамдык менен жашасаң кара өң сени булгап салат.
* * *
Ичи тардык, көрө албастыкты алып келет. Көрө албастык
жан дүйнөнүн тардыгын аныктайт.
* * *
Ушакты жаратуучулар болот. Аны ташыгычтар болот.
Баары биригип жаңжал чатакты түзүүчүлөр.
* * *
Жоголуп кеткен өмүрдү эстеген пайдасыз.
Карабай кеткен тууганды эстеген пайдасыз.
Колдонулбай калган байлыкты ойлогон пайдасыз.
Сатып алып, окулбай жаткан китептер да пайдасыз.
* * *
Кабак бүркөгөн каар жаман, чырлуу чатак да жаман, Каар менен чатакты алып жүргөн адам андан бетер жаман.
* * *
Каар менен куралданып жүргөн адам, башка адамдын соккусуна кабылуучу адам.
* * *
Ата-эненин асыл кеңешин укпаган бала, башка бир наадандын жандын соккусуна кабылат
* * *
Көпкөндүк наадандыктын дал өзү. А наадандык тарбиясы жок текебердик мүнөз..
* * *
Акылы бөксөлөрдү да түшүнсө болот. Алардын негизги куралы;ачуулануу менен каар.
* * *
Акылга-акыл кошулганда биз көрө элек сырдуу ажайып дүйнө жаңырып ачыла келет.
* * *
Токтоолук акыл менен айкалышса, ал адам жеңишке оңой жетет.
* * *
Ар дайыма капаланып жүрүү бул – дарт. Көңүл чөгүү адамды сөзсүз сары ооруга кабылтат.
* * *
Жатаарда жакшы келме келтирип, жаратканга, сыйынып жаткыла! Уйкуңар тынч болуп, жакшы түштөрдү көрүп ойгоносуңар!
* * *
Эмгек гана өлүмдүн жолун тосот. Эмгектен бакыт тапкан адамдды эли кайра-кайра эскерип, унутпай турат.
* * *
Туулган жерим кичинекей айылым, чоочун адамдарга белгисиз жер. Бирок менин жүрөгүмдө калкып жаткан чоң материк.
* * *
Адамга келишимдүү көрк бере турган нерсе, эмгек менен акылдын айкалышы.
* * *
Эмгек адамга байлыкты түзөт. Байлык адамга бакубат жашоону түзөт. Эмгек менен бакубат жашоо жанаша жашап, адамдын унутулгус өмүрүн түзөт.
Ажал коркунучтуу кубулуш, бирок ал талбас эмгек, таланттан сөзсүз жеңилип келе жатат.
* * *
Дүйнөдө жыргал уйку да бар, тынч жашоо да бар. Экөөнүн жанында жакшы ден соолук бар.
* * *
Адам үчүн эң эле табылгыс дары – күлкү. Бирок ал эч жерде сатылбайт. Күлкүнүн дарысын куудул,жайдары, жашоону сүйгөн көңүлүндө кири жок адамдар жаратат.
* * *
Ар бир адам бактылуу болууга тийиш, ал ошол үчүн төрөлгөн. Бирок бактысыз адамдар кайдан чыгып жатат?
* * *
Ар дайыма адамдын көңүлүн оорутуп жүргөн адамдар шектүү пенделер. Же алар билинбеген оорулуу адамдар. Ал ошол жаман мүнөзү менен адамдардын көңүлүн оорутуп, оору тараткан адамдар.
* * *
Өмүр бою убайым тартып жүргөндөрдөн кубаныч качат.
* * *
Жүрөгүң ооруп турганы балакет анткени, денеңин бүткүл бөлүгүн ошого баш ийип, ошол байкап ошол кам көрүп турат.
* * *
Адамга айтылган каар денеңе көңүл чөгүүнү жаратат, ал эми күлкү бүткүл денени аралап кубанычты жаратат..
* * *
Ушак денеге уурданып келет, күлкү ачык шайыр нур жаркытып келет.
* * *
Денеңдеги каарды кубалап чыкса болот, ал эми күлкүнү эч ким кубалабайт, анткени ал күлгүн өмүргө керек.
* * *
Суу кармалбайт, анткени суюк, адам жараткан күлкү көңүлдө кармалат. Ошол үчүн ал узак жашоону камсыз кылат.
* * *
Табияты суз адамдар күлкүгө караганда каарга жакын болот. Ошол үчүн алар тез улгайып, чачын ак чалат.
* * *
Жайдары, тамашаны сүйгөн адамдарды узак жашоону «Бергелгин» деп чакырып турат.
* * *
Адамда кайгынын чеги болот, ал эми кубаныч менен күлкүнүн чеги жок. Ошол үчүн жашоо күлкүгө жана ырахатка бөлөнгөн.
* * *
Жайдарылык жана эмгек менен жашаган адамдар дайыма өзүнө күлкүлүү өмүрдү чакырып турат.
* * *
Коркунуч – бул дарт. Ар дайыма коркунучту жараткан пенде баарыбыздын душманыбыз. Ал дарт шайыр жашоонун душманы.
* * *
Коркуп жүргөн адамга айлана-чөйрө баары башкача болуп көрүнүп турат. Анткени анын жүрөгүндө коркунуч кетпей турат.
* * *
Дарыгер үчүн эң башкы нерсе оорунун накта атын табуу, андан кийинки нерсе ошол ооруну кууп чыгуу. Кээ бир жарыгерлер оорунун атын таппай эле дарылай берет. Ал ден соолукка баш аламан иш кылгандык. Баш аламандык адамды байкатпастан өлүмгө кабылтат.
* * *
Жол бирөө ошол жолдо алмай-телмей каттаган жолоочулар өтө көп.
* * *
Миң кой бир карышкырды коркута албайт. Бир карышкыр миң койдун үрөйүн учуруп, коркута алат. Анткени койлор үчүн ал карышкыр жана жырткыч.
* * *
Бейкуттук жана жымжырттык адамдарга өтө керек, анткени ал адамдардын самаган нерсеси. Жымжырттык адамга келген чарчоону кууп чыгат.
* * *
Тамакты тер агызып иштеп табыш кымбат Аны аймап-жаймап жеп салыш баарынан оңой.
* * *
Адам уктаганда жалгыз эле эс албай кайра жаңырат.
* * *
Денеси чың, кайраттуу, акыл-эс жагынан толкуп ташкан адамдар, биздин коомубузга өтө керек.
* * *
Жаштык бул-ден соолук, а ден-соолуктун өзүнөн деле жаштык көрүнүп турат.
* * *
Дене тарбия адам үчүн өтө керек нерсе, бирок ал көп адамдардын көңүлүнөн сырткары калат. Андай адамдарга оору бат эле келет
* * *
Бир берилген өмүрдү туура эмес пайдалануу жашоонун
чачкындыгына алып келет.
* * *
Өмүр бул адамга берилген чоң ырыскы.ал ырыскынын кубанычын ошол адам өзү көрөт.
** *
Маркумдар күкүктүн үнүн такыр укпайт, бирок тирүүлөр күкүктүн үнүн угуп, өлгөндөрдү эскеришет. Анткени өлгөндөр бул жашоого күкүк сыяктуу үн салып кетишкен.
* *
Таразанын ташы салмактуу, кайгыдан кубаныч салмактуу, оор басырыктуу кишинин сүйлөгөнү салмактуу.
* * *
Адамдардын тирүүсүндө баркына жеткиле! Өлгөндөн кийин «Сыйлай албай калдым» деп, арманга батпагыла!.
