Osman ISLÂM
Cemil Kence. Bala şiirleri. I kitap

Cemil Kence

(1896-1945)

Qırımtatar şairi Cemil Velilâ oğlu Kence 1896 senesi Seitler, soñra Qarasuvbazar rayonı, Ableş köyünde fuqare qorantasında doğdı. Cemilniñ evlerine sıq-sıq musafirler kele ediler. Kiçkene Cemil olarnıñ ikâyelerini çetçikte oturıp büyük diqqatnen diñley. Yaşı yetken soñ Cemil mektepke qatnap başlay. Onıñ ilki ocası Seit-Murad Kefeli olğan. Mektepkte oquğan vaqıtında Cemil edebiyat derslerine meraqnen qatnay, ocası ise onıñ edebiyatqa avesligini körip, çoq yardım ete. Cemil başlanğıç mektepni on dört yaşında bitire. Soñra Köpürliköy mektebine oqumağa kire. Bu mektepte oqur eken, kene edebiyat derslerini büyük meraqnen diñley ve mında özü de şiirçikler yazıp başlay.

Bütün ömürini yaş nesilge, bilim ve terbiye meselelerine bağışlanğan Cemil Kence balalarnıñ ömürini yahşı bile edi. Şunıñ içün olsa kerek, o edebiyatımızda acayip bala şairi olaraq munasip yer alğan.